ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថាសម្ដេចមិនដែលប៉ុនប៉ងធ្វើអ្នកធំទេកាលពីសម្ដេចនៅយុវវ័យ។ សម្ដេចបានលើកឡើងថាកាលពីក្មេងសម្ដេចមានបំណងចង់ខ្លាចជាគ្រូបង្រៀនមួយរូបតែប៉ុណ្ណោះ។

ថ្លែងនៅក្នុងពិធីបិទវគ្គបណ្ដុះបណ្ដាលនិងបើកវគ្គបណ្ដុះបណ្ដាលថ្មីនៃសាលាភូមិន្ទរដ្ឋបាល ព្រឹកថ្ងៃទី២៧ ខែមេសា ឆ្នាំ២០២៣នេះ សម្ដេចតេជោ ហ៊ុន សែន បានថ្លែងថាសម្ដេចមិននឹកស្មានថាបានក្លាយជានាយករដ្ឋមន្ត្រីកម្ពុជារហូតដល់ជិត ៤ ទស្សវត្សនោះទេ។

សម្ដេចបានលើកឡើងថា៖ «អាហ្នឹងវាថាជាព្រហ្មលិខិតក៏ថាបានតែបើយើងមិនប្រឹងទេក៏វាមិនបានដែរ»។

បើទោះបីក្លាយជានាយករដ្ឋមន្ត្រីដែលមានអំណាចនៅកម្ពុជាក្ដីតែរបួសផ្លូវចិត្តរបស់សម្ដេចនៅមិនទាន់អាចព្យាបាលបាននោះទេ។

សម្ដេចបានលើកឡើងថាខណៈពេលដែលមនុស្សខ្លះដេកយល់សប្ដិថាខ្លួនជានាយករដ្ឋមន្ត្រី តែសម្រាប់សម្ដេចគឺ ៨០%នៃយល់សប្តិគឺជារឿងឈឺចាប់នៃអតីតកាល។

សម្ដេចថា៖ «របួសរាងកាយអាចព្យាបាលបានតែរបួសផ្លូវចិត្តគឺពិបាកណាស់»៕